«Философия және саясаттану» кафедрасының аға оқытушысы Алтынбекова З.Т. ұйымдастыруымен кафедраның тәрбие жоспарына сәйкес 2021 жылдың 21 сәуірінде Дулати университеті студенттерінің «Білім және білік» тақырыбында «Болашақ» бағдарламасының түлегі, «Абай жолы» тарихи драмалық телехикаяның қоюшы режиссері, сценарист Мұрат Есжанмен кездесу өтті.

Тәрбиелік іс-шараның мақсаты: студенттердің білімге, өнерге қызығушылығы мен іздемпаздылығын арттыру; студент жастардың тұлғалық мәдениетін қалыптастыру; Отансүйгіш патриот жастарды тәрбиелеу.

Іс-шараға университеттің «Мұнай, газ және механика», Су шаруашылығы, экология және құрылыс», «Технологиялық» факультеттерінің 2 курс студенттері (40 жуық), кафедраның ПОҚ қатысты.

Кіріспе сөзінде модератор шақырылған қонақ Мұрат Есжанды таныстырып өтті. Мұрат Есжан магистратураны АҚШ-тың Сан-Франциско қаласында Өнер академиясында оқып, сценарист мамандығы бойынша бітіріп, елге киносценарист болып оралды. АҚШ-та оқып жүріп ағылшын тілінде қысқаметражды "I'm going to Paris", елге ораланында 2018 жылы қазақ тілінде "Тиын" деп аталатын фильмдерді түсірді. 2020 жылы желтоқсан айында "Хабар" арнасында "Абай жолы" тарихи-драмалық 6 бөлімнен тұратын телехикаясы көрермендер назарына ұсынылды. Сұхбат спикерге қойылған сұрақтары төңірегінде жүргізілді: 1) Шетелде білім алудың артықшылығы мен кемшілігі? 2) «Абай жолы» телехикаяның басқа драмалық кинолардан ерекшелігі неде? 3) Киносценарист маманы ретінде сіздің ойыңызша әлемдік деңгейдегі рейтенгі жоғары болған «Сұлтан Сүлеймен», «Паразиты» сынды кино түсіру үшін біздің кино мәдениетіміздің жетілуіне, заманауи талапқа сай келетіндей не жетіспейді?

Мәселен, шетелде білім алудағы артықшылықтары мен кемшіліктері неде? - деген сұраққа Мұрат Есжанның берген жауабы студенттерге білім алуда қажет дүниелер мен тұстарын түртіп алатындай ой салды. «Абай жолы» телехикаясының басқа драмалық кинолардан ерекшелігі неде? – деген сұраққа: «Тарихи-драмалық туынды әйгілі жазушы М.Әуезовтың «Абай жолы» роман-эпопеясын жазу барысы мен Абай өмірінің романға арқау болған кейбір сәттерін баян етеді» - деп жауап берді. Үшінші қойылған сұраққа: Киносценарист ретінде сіздің ойыңызша әлемдік деңгейдегі рейтингі жоғары «Сұлтан Сүлеймен», «Паразиты», «Чернобыль» сынды кино туындыларын түсіру үшін біздің кино мәдениетіміздің жетілуіне, заманауи талапқа сай келетіндей не жетіспейді? – былай жеп жауап берді: «Әрине ең алдымен қаржы, екіншіден уақыт ресурсы. Сондай ақ кез-келген киносценарист, қоюшы режиссер болсын өз тарихын, тамырын терең білгені жөн». Студент жастарымызға топ-3 нақты аға буын ретінде қандай ақыл кеңесіңізді берер едіңіз деген сауалға: 1. Ерте жату. Ерте жатсақ, ерте тұрамыз. Соның есесіне, біраз жұмысымыз орындалады; 2. Ағылшын және орыс тілдерін жеткілікті дәрежеде міңгеруді мақсат тұту; 3. Өз салаңыз бойынша қосымша кітаптарды көп оқу керек – деп жауап берді.

Екі сағатқа созылған іс-шара сондай ақ студенттердің спикерге қойылған сұрақтарымен, яғни сұрақ-жауап айдары қызу пікір алмасумен өтті. Жиын соңында студенттер мен кафедра ПОҚ Мұрат Есжанға алғысын білдіріп, алдағы уақытта киносценарист маманы ретінде жастар аудиториясына қызықты, тәрбиелік мәні бар рейтингі жоғары туындыларын күтетінің айтты.

«Философия және саясаттану» кафедрасының

аға оқытушысы Алтынбекова З.Т.