Ағымдағы жылдың 18-19 қазанында Қазақстанда decentrathon 2.0 — ең ірі мультилокациялық хакатон өткізілді. Мақсаты — 48 сағат ішінде өзекті міндеттердің жаңа шешімдерін ұсыну, инновациялық өнім идеяларын дамыту және жасанды интеллект, блокчейн,Telegram үшін ойындар мен шағын қосымшаларды әзірлеу саласындағы стандартты емес тәсілдерді көрсету.

 $50,000 жүлде қорын құрайтын хахатонның ұйымдастырушылары — Astana Hub технопаркі мен Blockchain & AI Technology орталығы. Аталмыш іс-шара Қазақстанның озық технологиялардағы өңірлік көшбасшы ретіндегі ұстанымын нығайтады және еліміздегі AI қауымдастығын құруға мүмкіндік береді.  
Қатысушылар қомақты ақшалай жүлде үшін бәсекеге түсіп, саланың жетекші компанияларына жобаларын таныстыруға және IT мамандарының жетекшілігімен білім мен практикалық дағдылар алуға мүмкіндік алады.

Қазақстан Республикасы цифрлық даму, инновациялар және аэроғарыш өнеркәсібі министрлігінің қолдауымен өткізілген іс-шара еліміздің 17 аймағын қамтып, 2000-нан астам қатысушы өз шешімдерін ұсынды.  Ірі қалалар мен өңір орталықтарында ұйымдастырылған хахатоннан Жамбыл облысы да белсенділік танытуда. Жамбыл хаб өңірлік филиалының бастамасымен М. Х. Дулати атындағы Тараз университетінің базасында ұйымдастырылған іс-шараға өңірден 30-дан астам команда қатысты.

Қатысушылар екі күн ішінде жасанды интеллект, блокчейн, ойын әзірлеу және Telegram mini-apps сияқты негізгі технологиялық бағыттарда өздерінің инновациялық әзірлемелерін ұсынды. Нәтижесінде, университеттен қатысқан “Қолданбалы информатика және бағдарламалау” кафедрасының 4-курс студенттерінен құралған Dulaty Team командасы екінші кезеңге жолдама алып, 400 000 теңге жүлде қорының иесі атанды. Оқу ордасының беделін көтеріп, белсенділік танытып жүрген команданың құрамында Қалдыбек Нұрмұхаммед, Байжанов Нұрсұлтан, Инамжанов Санжар, Саметдинов Ильёсходжа бар. Екінші кезеңге өткендер қатарында “Ақпараттық жүйелер” кафедрасының Something Original командасы да бар. Команда жетекшілеріне алғыс білдіре отырып, студенттерді жүлдесімен құттықтаймыз және екінші кезеңде жеңіспен оралуын тілейміз!

Хакатон бұл it-энтузиастарға арналған жарыс, онда қатысушы қысқа уақыт ішінде және тоқтаусыз режимде белгілі бір технологиялық тапсырманы шешуі тиіс.