Креативті индустриялар форумындағы маңызды сәттің бірі – «SHORT VISION – ҚЫСҚА ШОЛУ» кинофестивалі.

Кинофестивальге еліміздің жоғары оқу орындарынан 27 қысқаметражды фильм түсіп, 10 туынды қабылданған болатын.  Дулати университетінің бас ғимаратында үздік қысқаметражды фильмдер көрермен назарына ұсынылды. Кино мен театр саласы мамандарынан құралған қазылар алқасының шешімімен үздік туындылар арнайы номинациялармен марапатталды.

Taraz Creative Industries 2026 Креативті Индустриялар форумының екінші күні «Идеядан өнімге дейін: креативті индустриялар цифрлық экономика мен smart city дамуының драйвері ретінде» пленарлық отырысымен жалғасын тапты.

Форум аясында екі бірдей Меморандумға қол қойылды. Жасанды интеллект зертханасын құру және дамыту мақсатында М.Х. Дулати атындағы Тараз университеті Назарбаев Университеті жанындағы ISSAI Ақылды жүйелер, жасанды интеллект институтымен  және «Alem.ai Foundation» корпоративтік қорымен  өзара ынтымақтастық туралы меморандумға қол қойды.

Меморандумның негізгі мақсаты: Жасанды интеллект (ЖИ) және ақпараттық-коммуникациялық технологиялар (АКТ) саласында жоғары білікті кадрларды даярлау.  Студенттердің цифрлық құзыреттіліктерін дамыту және өзара тиімді байланысты кеңейту.  Қазақстан Республикасының цифрлық экономикасы үшін бәсекеге қабілетті мамандарды қалыптастыру.

Пленарлық отырыста Ғылым және жоғары білім вице-министрі Динара Щеглова жасанды интеллект пен цифрлық технология жаңа мүмкіндіктерге жол ашатыны туралы ой қозғады. Бұл салада кадр даярлау, білім беру бағдарламаларын жетілдірудің маңыздылығына тоқталды.

М.Х. Дулати атындағы Тараз университетінің Басқарма Төрағасы – Ректор Ләззат Еркінбаева цифрлық технология бойынша университеттегі бағдарламалар мен жобалар туралы ақпарат айтып, ЖИ бойынша қолға алынған жобалардың жемісті болуын тіледі.  

Жамбыл облысы әкімдігінің цифрландыру және архивтер басқармасының басшысы Шалхар Амантуров  өңірді цифрландыру бойынша атқарылған жұмыстар туралы ақпаратпен бөлісті. Облыс халқын интернетпен қамтамасыз ету бойынша нәтижелерді айтып, «Ақылды өңір» көрсеткіші бойынша Жамбыл облысы 17 орыннан 11 орынға көтерілді деп мәлімдеді.

Назарбаев Университетінің Ақылды жүйелер және жасанды интеллект институтының (ISSAI) атқарушы директоры Ербол Абсалямов  жасанды интеллект (ЖИ) пен цифрлық технологиялар бойынша мамандар даярлау және заманауи білім беру ортасын құру - мемлекеттік саясаттың маңызды бағыты екеніне кеңінен тоқталды. Жасанды интеллект модельдерін қазақ тілінде сөйлету, тілдің ерекшеліктерін түсіндіру және аударту бойынша қолға алынған жобалар туралы мәлімет берді. Институт тек Назарбаев университетімен шектелмей, өзге аймақтардағы жоғары оқу орындарымен, соның ішінде М.Х. Дулати атындағы Тараз университетімен бірлескен жобалар жасауды көздейтінін жеткізді.

«Qazinnovations» АҚ Басқарма төрағасының орынбасары Мадияр Абилов ғалымдар мен студенттердің жсанды интеллект саласындағы ғылыми жобаларын нарыққа сай бизнес өнімге айналдырудың маңыздылығын айтып, мемлекеттік гранттар мен қолдаулар туралы ақпарат берді. Отандық IT-стартаптар мен инновациялық жобаларды жетілдіру және өндіріске енгізу үшін «Qazinnovations» тарапынан берілетін мемлекеттік инновациялық гранттар мен қаржылай қолдау тетіктеріне тоқталды.

Astana Hub өңірлік даму офисінің директоры Нұржан Сағындық «Astana Hub» халықаралық технопаркінің мүмкіндіктерін өңірлерге жеткізу, соның ішінде Жамбыл облысында жергілікті IT қоғамдастықты қолдау және дарынды жастарға жағдай жасау мәселесін айтты. Студенттер мен бағдарламашылардың жасанды интеллект және Smart City бағытындағы жобаларын дамыту үшін арнайы оқыту бағдарламалары, инкубациялық кезеңдер мен инвесторлар тарту мүмкіндіктерін түсіндірді.

Пленарлық отырыс «Ақылды өңір: пилоттық жобалардан ауқымды өндіріске дейін» тақырыбында панельдік пікірталаспен жалғасты.

ҮЗДІК СТАРТАПТАР МЕН ЖОБАЛАР АНЫҚТАЛДЫ

Дөңгелек үстел форматында өткен  «Ақылды өңір: пилоттық жобадан ауқымды өндіріске дейін»  панельдік дискуссияда университет ғалымдары, IT-мамандар, сондай-ақ EPAM systems, Aviata.kz, «Банк ЦентрКредит» АҚ, Tomorrow school және өңірлік IT-хаб сарапшылары пилоттық IT-шешімдерді ірі өндірістік секторға енгізу механизмдерін талқылады.

Дискуссиядан кейін форумның  тартысты динамикалық кезеңі –  жас стартапшылар мен инноваторлардың Питч-баттл (Pitch Battle) финалы өтті. Аталған байқауға EdTech, MediaTech, FinTech, GovTech, GameDev, сондай-ақ жасанды интеллект (AI) негізіндегі өнімдерді ұсынған дарынды жастар мен стартап-командалар қатысты. Қатысушылар өз жобаларының бизнес-моделін, коммерциялық әлеуетін, технологиялық жаңалығын және өңірлік экономикаға берер тиімділігін шектеулі уақыт ішінде қорғап шықты. Қазылар алқасының құрамына венчурлық инвесторлар, Astana Hub пен өңірлік IT-хаб өкілдері, облыс әкімдігінің сарапшылары және креативті индустрия көшбасшылары енді. Әділқазылар тарапынан жобалардың бәсекеге қабілеттілігіне, масштабтау мүмкіндігіне және коммерцияландыру деңгейіне жоғары талаптар қойылып, үздік стартаптар анықталды.

Форум аясында өткен байқаулар мен питч-баттл қорытындысы бойынша жеңімпаздарды салтанатты марапаттау рәсімі   23 қазан күні «Баласағұн» орталық концерт залында өтеді.

Тараз қаласында аймақтың креативті экономикасы мен заманауи технологиялар саласын дамытуға бағытталған ең ірі оқиға – «TARAZ CREATIVE INDUSTRIES 2026» Халықаралық форумы өз жұмысын бастады. М.Х. Дулати атындағы Тараз университетінің ұйымдастыруымен өтіп жатқан ауқымды іс-шара бес күнге жоспарланған.

Халықаралық жиын аясында IT технологиялар, кино, сән, дизайн, өнер, жастар бастамалары және креативті кәсіпкерлік салаларының жетекші өкілдері бас қосты. Форумның басты мақсаты – шығармашылық пен инновацияны тоғыстыратын соны идеяларды қолдау, креативті хабтардың даму бағытын айқындау және заманауи жобаларды ілгерілету.

Баласағұн орталық концерт залында салтанатты түрде ашылған іс-шараға келген қонақтар алдымен өнер туындыларының көрмесін тамашалады.

Жиынды Қазақстан Республикасы Ғылым және жоғары білім министрі Саясат Нұрбек құттықтау сөзімен ашып, Дулати университеті бастамасымен жүзеге асқан форум жұмысына сәттілік тіледі. Өз сөзінде министр креативті экономиканың еліміздің болашақ әлеуетін арттырудағы маңызы жоғары екенін атап өтті.

М.Х. Дулати атындағы Тараз университетінің Басқарма Төрағасы – Ректор Ләззат Еркінбаева форумның мақсат-міндеті мен тарихи маңыздылығына  кеңінен тоқталды. Өз сөзінде ректор бұл шараның Тараз өңіріндегі шығармашылық әлеуетті жандандыруға және жастардың инновациялық идеяларына қанат бітіруге бағытталғанын атап өтті.

Форумның ресми бөліміне және пленарлық сессияларына елімізге белгілі қоғам және мемлекет қайраткерлері, зиялы қауым мен сала мамандары қатысты.

М.Х. Дулати атындағы Тараз университеті Директорлар кеңесінің Төрағасы Жолаев Рақымбек Қуатбекұлы, ҚР Ұлттық инженерлік академиясының академигі Баталов Амандық Ғаббасұлы, Қазақстан Республикасы Құрылтайының депутаты Нахбаева Гүлісхан Сайфулинқызы, Мемлекет қайраткері  Абдраймов Ғалымжан Райылұлы, Технологияларды коммерцияландыру кәсіпқойлары  альянсының басшысы Орсариев Арын Амангелдіұлы ашылу салтанатында құттықтау сөзін сөйлеп, жаңашылдыққа бастаған форум жұмысының жемісті болуын тіледі.

Пленарлық сессияда зерттеуші, тренер, қоғам қайраткерлері мен креаторлар презентация жасап, тәжірибелерімен бөлісті. Олардың қатарында  Дана Шаяхмет, Ерлан Шуланов, Мирас Дауленов, Айгерім Мусагажинова, Айгүл Ильясова сынды мамандар болды. Спикерлер баяндама жасаумен қатар, жастармен диалог орната отырып қызықты мәліметтермен, қажетті ақыл-кеңестерімен бөлісті.

Айта кетейік, Халықаралық форумның әр күні түрлі бағытқа арналған. Алда IT мамандары мен креативті сала өкілдерінің қатысуымен инновациялық стартаптар сайысы, воркшоптар мен шеберлік сабақтары, кино, сән, дизайн бағыттары бойынша байқаулар мен көрмелер өтеді. Тәжірибелі спикерлер студенттерге өз салалары бойынша құнды мәліметтер беріп, құпияларымен бөліседі.

Бұл апталық – идея алмасу алаңы ғана емес, жас креаторлардың бастамаларын нақты бизнес жобаға айналдыруға жол ашатын мүмкіндік.

М.Х. Дулати атындағы Тараз университетінің ұжымы әлем чемпионы, студентіміз Юсуф Ашраповты салтанатты түрде қарсы алды.

Чемпионды қарсы алу рәсімінде университет ректоры Ләззат Еркінбаева жеңімпазды жарқын жетістігімен құттықтап, оның жеңісі университет ұжымы мен барша қазақстандықтар үшін зор мақтаныш екенін атап өтті.

Бұл – табандылық пен тынымсыз еңбектің, жігер мен қайсарлықтың жемісі. Юсуфтың жеңісі жастарға үлгі болып, отандық спорттың мерейін асқақтата берсін!

 Юсуф, жеңісің құтты болсын!
Көк туымызды көкте желбіретіп, әлемдік ареналарда Қазақстанның абыройын асқақтата бер!

М.Х.Дулати атындағы Тараз университетінде белгілі ғалым Сәмен Құлбарақтың 70 жылдығына арналған республикалық конференция өтті.

Университеттің бас ғимаратында көрнекті әдебиеттанушы ғалым, филология ғылымдарының докторы, профессор Құлбарақ Сәмен Оразғалиұлының 70 жылдық мерейтойына арналған «Қазіргі әдебиеттану мен дулатитану: дәстүр, трансформация және перспективалар» тақырыбында республикалық ғылыми-тәжірибелік конференция ұйымдастырылды. Ғылыми басқосуға еліміздің түкпір-түкпірінен жетекші ғалымдар мен зерттеушілер келді.

Алқалы жиынды  филология ғылымдарының кандидаты, доцент Темірбай Мұқашов жүргізді. Конференцияның шымылдығын М.Х. Дулати атындағы Тараз университетінің Басқарма мүшесі – Академиялық мәселелер бойынша проректоры Мақсат Мұсабеков мерейтой иесінің ұстаздық және ғалымдық ғибратты ғұмырына, оның отандық әдебиеттану ғылымы мен ұлттық руханиятты дамытуға қосқан үлесіне тоқталып, жылы лебізін білдірді.

Мерейтой иесін құттықтау үшін Шерхан Мұртаза атындағы Халықаралық Тараз инновациялық институтының Президенті Ерболат Саурықов, Ы.Алтынсарин атындағы Арқалық педагогикалық университетінің Зерттеу және стратегиялық даму жөніндегі проректоры Аслан Тұрлыбек арнайы сөз алып, ғалымға ізгі тілектерін жолдады.

Басқосу аясында қатысушылар назарына «Сәмен Құлбарақ: ғалымдық ғұмыр, әдебиет және дулатитану» тақырыбында кітап көрмесі таныстырылып, ғалымның өмір жолы туралы «Ғибратты ғұмыр» танымдық бейнематериалы көрсетілді.

Пленарлық отырыста сөз өнерінің зергерлері мазмұнды баяндамалар жасады. Ғалымдар профессор Сәмен Құлбарақтың Тахауи Ахтанов шығармашылығын зерттеудегі еңбегін, Рымғали Нұрғали ғылыми мектебінің жалғастығын және оның «Мұхаммед Хайдар» романындағы авторлық таным ерекшеліктерін жан-жақты талдады.

Жиында сөз алған филология ғылымдарының докторы, профессор Балтабай Әбдіғазиұлы ғалымның ұлттық мүдде жолындағы еңбегін жоғары бағалады: «Профессор Сәмен Құлбарақтың ғылыми мұраты ұлттық мүддемен сабақтасып жатыр. Оның зерттеулерінде қазақ әдебиетінің рухани құндылықтары, ұлттық сана мен елдік ұстанымдар ғылыми негізде жүйелі зерделенген» - деп өз бағасын берді. Абай атындағы Қазақ ұлттық педагогикалық университеті ректорының құттықтауын жеткізген Балтабай Әбдіғазиұлы мерейтой иесіне «Абай» төсбелгісін тақты.

Филология ғылымдарының докторы, профессор Жанат Әскербекқызы Сәмен Құлбарақтың ғылыми мектептер сабақтастығындағы орнына тоқталды:

«Академик Рымғали Нұрғали қалыптастырған әдебиеттану мектебінің ғылыми дәстүрі профессор Сәмен Құлбарақтың еңбектерінде мазмұндық және әдіснамалық тұрғыдан жалғасын тапты. Бұл сабақтастық ғалымның әдеби мұраны талдау ұстанымдары мен зерттеу әдістерінен айқын көрінеді» деді.

Филология ғылымдарының кандидаты Ғабит Тұяқбаев Тахауи Ахтанов көркемдік әлемінің С. Құлбарақ еңбектеріндегі сипатына тоқталып: «Профессор Сәмен Құлбарақ Тахауи Ахтановтың көркемдік әлемін дәстүр мен жалғастық сабақтастығы аясында жүйелі қарастырып, оның қазақ әдебиетіндегі эстетикалық орнын терең айқындады» - деп атап өтті.

Пленарлық отырыста бұдан бөлек Құлбек Ергөбек, Ақыш Нұрдәулет, Бақытжан Мақашев сынды зерттеушілер мен ғалымдар баяндама жасап, ғалымның жазушылық, зерттеушілік қырларын аша түсті.

 Сәмен Оразғалиұлының қызы Ұлпан Сәменқызы конференция аясында әкесіне ыстық ықыласын білдіріп, «Мұхаммед Хайдар» романындағы тарихи тұлғаның көркемдік концепциясы турасында сөз қозғады.

Конференция жұмысы төрт негізгі секция бойынша жалғасты. Онда ғалымның ғылыми мұрасы мен дулатитану бағыттарынан бөлек, заманауи тренд - жасанды интеллект дәуірінде тілдерді оқытудың инновациялық ізденістері мен білім берудегі жаңа әдіс-тәсілдер кеңінен талқыланды.

Конференция материалдары негізінде электрондық ғылыми еңбектер жинағы таяу күндері оқу орнының ресми сайтына орналастырылып, ғалымдар мен ізденушілерге жол тартады.

Басқарма мүшесі-Академиялық мәселелер бойынша проректор Мұсабеков Мақсат Несіпжанұлының ұйымдастыруымен Индустрия және цифрлық технологиялар жоғары мектебінің бітіруші курс студенттерімен маңызды кездесу өтті.

Кездесуге Академиялық жұмыс департаментінің директоры, жоғары мектеп деканы, декан орынбасарлары, кафедра меңгерушілері және ПОҚ қатысты.

 Кездесу барысында бірқатар маңызды мәселелер қарастырылды:

Дипломдық жобалардың ерекшеліктері мен оларды қорғауға қойылатын талаптар;

 Академиялық адалдық қағидаттарын қатаң сақтау;

 Дипломдық жобаларды орындау барысында плагиатқа жол бермеу;

Қорытынды аттестаттауға сапалы дайындық;

 Түлектердің әр түрлі сауалнамаларға қатысуы және оларды уақытылы толтыруы;

 Кездесу ашық диалог форматында өтіп, студенттер өздерін толғандырған сұрақтарға жауап алды.

 Кездесудің басты мақсаты – түлектердің қорытынды аттестаттауға дайындығын арттыру, академиялық адалдық мәдениетін нығайту және кәсіби жауапкершілігін қалыптастыру.

Дулати университетінің студенті Юсуф Ашрапов АҚШ-тың Лас-Вегас қаласында өтіп жатқан U23 әлем чемпионатында алтын медаль жеңіп алып, Қазақстан қоржынына кезекті алтынды салды!

72 келі салмақ дәрежесінде ел намысын қорғаған балуанымыз финалда Армения спортшысы  Гаспар Тертерянмен кездесіп, 4:3 есебімен жеңіске жетті. 

Юсуфтың әлемдік додада топ жаруы – университетіміз үшін үлкен мақтаныш!

Юсуфты, оның бапкерлерін, жақындарын және Дулати университетінің ұжымын осынау айтулы жеңіспен шын жүректен құттықтаймыз!

Алтын медаль құтты болсын! Көк туымыз көкте желбіреп, чемпиондарымыз әлемдік ареналарда Қазақстанның абыройын асқақтата берсін!

Дулати университетінің бас ғимаратында өңіріміздің алдыңғы буын өкілі – ардақты ардагерлер қауымы бас қосты. Негізгі себеп – мемлекет басшысы Қасым-Жомарт Кемелұлы Тоқаевтың «Әділетті қоғамға – шыншыл сөз» кітабының таныстырылым жиыны.

Жиынға ардагерлер қауымымен қатар, университеттің профессор-оқытушылар құрамы, студенттер қатысты.

Кітап таныстырылымында М.Х. Дулати атындағы Тараз университетінің Басқарма Төрағасы – Ректор Ләззат Еркінбаева кітап туралы ойымен бөлісті. Идея мен істі байланыстыратын бұл еңбектің жарық көруі  бүгінгі реформалар кезеңіндегі маңызды қадам екенін айта отырып, еңбектің құндылығы –  әр жылдары, әртүрлі мінберлерде айтылған ойлардың өзара берік сабақтастығында екеніне тоқталды.

Жиын модераторы «Тарих және география» кафедрасының қауымдастырылған профессоры Сейдахан Бақторазов жарық көрген жинақтың мақсаты мен құрылымы туралы ақпарат берді.

Облыстық ардагерлер кеңесінің төрағасы Еркінбек Солтыбаев кітап турасындағы ойымен бөлісіп, ел ынтымағын сақтауда, ауызбіршілігін нығайтуда ардагерлердің алатын орнына ерекше тоқталды. Алдыңғы буын өкілі – ардагерлердің міндеті өткенді еске алу ғана емес, ұлттық құндылықтарды дәріптеп, жастарды патриоттыққа тәрбиелеп, ақыл-кеңес беру екенін тебірене жеткізді.

Шара аясында «Әділетті қоғамға – шыншыл сөз» кітабы Кітапханалық-ақпараттық орталықтың директоры Гүлжан Иржановаға табыс етілді.