Университет қабырғасында қазақ поэзиясы мен журналистикасының көрнекті өкілі, Халықаралық «Алаш» әдеби сыйлығының лауреаты, «Құрмет» орденінің иегері, ақын және тележурналист Ғайни Әлімбекқызына арналған «Сен берген гүл» атты әдеби-сазды кеш ұйымдастырылды.

Кешке арнайы «Абай ТВ» телеарнасының бас продюсері, Халықаралық «Болашақ» бағдарламасының иегері, ақын, тележүргізуші, филология ғылымдарының кандидаты Жаңылхан Асылбекова, ҚР Еңбек сіңірген мәдениет қайраткері,белгілі режиссер , документалист Ботагөз Исмаил, ҚР Ұлттық кітапханасының «Көрме және мәдени бағдарламалар» қызметінде  топ жетекшісі, ҚР мәдениет саласының үздігі, «Ерен еңбегі үшін» медалінің, ҚР Президентінің «Алтын барыс» төсбелгісінің иегері Қайырниса Жұмашева, Қазақстанның Құрметті құрылысшысы Сыздық Борсабаев, жеке кәсіпкерлер Нұрғиса Сүлейманов және Ардақ Ақсақалова шақырылды.

Кештің мақсаты – Ғайни Әлімбекқызының поэзиясы мен журналистика саласындағы мол мұрасын жас буынға кеңінен насихаттау. Сонымен қатар, туған жерге, ұлтқа, рухани құндылықтарға деген сүйіспеншілікті арттыру арқылы махаббат, ізгілік пен адамгершілік тақырыптарын көпшілікке тереңірек жеткізу.

Кеш ақын жайлы дайындалған бейнероликпен басталып, көрермен назарына «Сен берген гүл» туындысының сахналық көрінісі ұсынылды. Бұл көрініс кештің лирикалық бағытын анықтап, ақын поэзиясының нәзік сырларын ашуға жол салды. Сонымен қатар, кеш барысында ақынның Тараз шаһарына арнаған өлеңдері оқылып, көрерменнің жүрегіне ерекше әсер қалдырды. Ғайни Әлімбекқызы қаланың тарихы мен рухани келбетін, киелі мекен ретіндегі құндылықтарын ерекше нәзіктікпен бейнелеген. 

Ақын Жамбыл облыстық телеарнасында 30 жылға жуық қызмет атқарып, өңірлік журналистиканың дамуына үлкен үлес қосты. Оның «Айна», «Айша бибі», «Өмір-өткел», «Жомарт жүрек», «Ғұмырнама», «Тараз төрінде» секілді бағдарламалары телеарнаның алтын қорына енген. Танымал тұлғалар туралы түсірген деректі фильмдері, ел тарихына арналған жобалары  – бүгінгі жас журналистер үшін үлкен тағылым.

Арнайы шақырылған қонақтар сөз алып, Ғайни Әлімбекқызының шығармашылық жолын және поэзия мен журналистикадағы еңбегін жоғары бағалады. Олар ақынның әрбір туындысы ұлттық рухты дәріптейтінін, туған жерге деген махаббатты ерекше  насихаттайтынын атап өтті. Сонымен қатар, шығармашылық туындылары жас ұрпақты әдебиетке деген қызығушылығын арттырып, поэзия әлемін терең түсінуге жол ашатынын айтты. Ғайни Әлімбекқызының мол тәжірибесі мен көркемдік шеберлігі көрерменге рухани азық болып, кештің мәдени деңгейін көтергені де сөз болды.

«Сен берген гүл» атты әдеби-сазды кеш көрерменге мәдени және рухани демалыс сыйлап, ақын шығармашылығының мәнін терең ұғындырды. Қонақтар ұйымдастырушыларға алғыстарын айтып, жылы лебіздерін білдірді.